Քիմիական զէնքերու տարածման արգիլման կազմակերպութիւնը` խաղաղութեան Նոպելեան մրցանակակիր
Նոպելեան յանձնախումբը Օսլոյի մէջ յայտարարեց Խաղաղութեան Նոպելեան մրցանակի 2013-ի դափնեկիրին
անունը: Հեղինակաւոր մրցանակին արժանացած է Քիմիական զէնքի տարածման արգիլման կազմակերպութիւնը
(ՔԶՏԱԿ), որ Սուրիոյ մէջ քիմիական զէնքերու ոչնչացման հոլովոյթը պիտի ապահովէ: ՔԶՏԱԿ-ի
մասնագէտները Սուրիոյ մէջ քիմիական զէնքի վերաբերեալ տեղեկութիւններ կը հաւաքեն` զանոնք
մինչեւ 2014-ի կէսը ոչնչացնելու համար: Հեղինակաւոր այս մրցանակի յաւակնորդներու շարքին
էին փաքիստանցի դեռահաս իրաւապաշտպան Մալալա Եուսուֆզայը, քոնկոյաբնակ բժիշկ Տենիս Մաքվեկը,
որ հազարաւոր բռնաբարուած ու քաղաքացիական պատերազմի ժամանակ կտտանքներու ենթարկուած
կիներ բուժած է, ռուսական իրաւապաշտպան «եռեակը»` Լիւտմիլա Ալեքսեւան, Սվեթլանա Կաննուշինան
ու Լիլիա Շիպանովան, որոնք մարդկային իրաւունքներու խախտման հարցերով Քրեմլինի ամէնէն
բուռն քննադատներէն են: Սակայն, ըստ «Տը Թելեկրաֆ» օրաթերթին, այդ մրցանակի ամէնէն
վիճայարոյց թեկնածուներն են Ռուսիոյ նախագահ Վլատիմիր Փութինն ու «Սի.Այ.Էյ.»-ի նախկին
աշխատակից Էտուըրտ Սնոուտըն: Ընդհանուր առմամբ, Խաղաղութեան մրցանակի յաւակնորդներու
թիւը այս տարի հասած է 259-ի, որոնցմէ 50-ը կազմակերպութիւններ էին: